TVB繼去年推出女團After Class後，今年年頭再推出限定10人男團Super Tiger，並喺賀歲節目壓軸跳唱兩首歌曲，成功引起網民熱烈討論。近日Super Tiger作出重組，並由10人男團變成7人男團，連最為人熟悉嘅「C位」羅天宇都離團。
喺賀歲節目中，有「女神收割機」之稱嘅羅天宇企正C位，並帶領其餘9位成員（許俊豪、丘梓謙、鄒兆霆、曾展望、林俊其、魏柏豪、劉展霆、李紹堅及宋懿芳）跳唱歌曲，雖然佢哋咪嘴同埋舞步唔齊整，不過勝在襯晒紅黑造型，甚有隊型。節目出街後，唔少網民仲將佢哋同ViuTV嘅MIRROR、ERROR同P1X3L比較。呢幾個月Super Tiger都冇咩動靜，甚至出道歌曲都未有，不過就已經重組，由10人男團變成7人男團，當中有6為成員已經退團，分別係「C位」羅天宇、鄒兆霆、曾展望、林俊其﹑魏柏豪及李紹堅。話明重組，有人退出就當然有人加入，新成員包括前天堂鳥隊長葉泓聲（Gordon）、林子超及邵展鵬。而重組後嘅Super Tiger將會與袁偉豪喺慈善籌款節目《萬眾同心公益金》獻唱張學友嘅名曲。
唔少網民知道Super Tiger重組後，一面倒不獲網民太睇好，例如「重組? 組咗有幾耐, 咁快cut人?」、「一首自己既歌都未有就重組???!!」、「未有出道作就重組」、「仲Tiger Supermarket都潮過佢」、「咁快就少咗人 會唔會一兩星期後得返三個人」、「希望佢唔係諗住用黎打低 Mirror, 打低 Error 都窄窄地……..」、「有冇破團隊最短紀錄改人數」、「8隻TVB Tiger加埋， 都不如Mirror 下弦果1隻Tiger」及「笑到肚痛 快d出道快d開演唱會」等等。