人物傳記片(Biopic)繼續係荷里活主流﹐而家只係6月，但係有套Biopic已經被視為下年奧斯卡爭獎分子之一，就係由新一代索爆邦女郎Ana de Armas演繹一代尤物瑪莉蓮夢露嘅Blonde。呢套戲嘅預告片已經出街，睇到網友嘩嘩聲，因為片中Ana造型以至神韻，都真係十分似夢露。
Blonde由《奪命無聲》同《叛逆暗殺》導演Andrew Dominik執導，改編自Joyce Carol Oates嘅瑪莉蓮夢露傳記小說。官方簡介指劇情重構夢露嘅一生，由成名前原名Norma Jeane嘅童年講起，而且故事會「模糊了夢露的真實人生與虛構故事，擴闊對佢公開與私下生活嘅分差」。
因為拍007而成為新一代女神嘅Ana ，對鑽研角色方面下咗唔少苦功，拍攝嘅差不多一年時間，佢係咁睇原著小說、睇當年夢露嘅相、影片、錄音，力求重現夢露呢個外在形象之下，Norma Jeane嘅感覺。
套戲被評級為NC－17，等同香港嘅三級片，呢一點曾經令導演同出品嘅Netflix關係緊張，但係導演訪問時就話好感激Netflix，仲話套戲一定大賣，更加爆粗指「啲xx觀眾唔鍾意係佢地有問題」！
Blonde將會喺9月23日上架，睇埋呢幾張劇照，你話係當年夢露嘅相我都信！