TVB近年唔少藝人離巢，最新一位宣布走人嘅係導演王晶愛女王子涵(Dada)！Dada尋日喺IG發文宣布離開效力8年嘅TVB﹐更表示呢8年「感覺像讀了一個碩士課程」，又話「我想好驕傲的説一句 我屋企三代都係TVB岀嚟㗎」。
的而且確，王子涵嘅爺爺王天林係TVB七八年代多套劇集監製，爸爸王晶入行初期都係喺TVB做編劇。王子涵18歲時參演阿爸監製嘅電影《七擒七縱七色狼》而入行，後來為now TV做過主持，到2015年加盟TVB，當時佢自爆同TVB簽咗8年長約，又承認係得到爸爸幫手鋪路。而Dada加入TVB所拍過嘅其中兩套劇《賭城群英會》同《荷里活有個大老千》都係王晶監製，不過晶哥喺訪問提過，自己當年喺TVB都冇跟住爸爸，所以寧願個女唔跟自己會冇咁大壓力，而且有更好嘅師父會學得更好，而《荷》入面王子涵同鄭則仕做父女，可以邊做邊學。
王子涵喺TVB主要工作係主持《姊妹淘》，而佢喺《愛·回家之開心速遞》演蔡玉皎亦算多人認識，但曾經被網民負評洗版。