近年TVB同ViuTV舉辦咗唔少真人騷形式嘅選秀節目，不過參賽者好多都係以年輕人為主，早前TVB就喺Facebook出PO，為《中年好聲音》進行宣傳招募。噚日（4日）節目進行面試，成功引嚟唔少中年參賽者參加，除咗有唔少唱功一流嘅隱世高手及音樂人之外，仲有跳大媽舞跳到出晒名嘅「屯門娜娜」董幸兒。
現年36歲嘅「屯門娜娜」董幸兒，一身性感火辣短裙造型，配上粉紅色嘅平髻現身，一啲都唔怯場嘅屯門娜娜，原本準備咗《勁舞Dancing Queen》同《風的季節》，不過佢喺表演《勁舞Dancing Queen》時表現拘謹，結果唔夠一分鐘就被評判叮走。佢喺接受傳媒訪問時就話自己志在參與，冇咩信心入圍。至於佢點解參加《中年好聲音》，佢就話一直以來都有唔少網民攻擊佢，話佢係大媽，所以既然有唔少網民認為佢會參加，於是佢就嚟參加，反擊網民嘅批評。
網民得知節目已經進行面試後，唔少網民都大讚節目好好，可以俾中年人追夢：「呢條橋好喎！睇得太多年輕人追夢的比賽了，中年人的心態不同，享受唱歌比賽多過尋求事業發展，齊齊尋開心。」、「我覺得幾好呀，俾啲中年人可以發揮下 支持」及「任何年紀都可以追夢，佩服各位的勇氣，加油，Good Luck」等等。另外，屯門娜娜參賽成功吸引唔少網民關注，留言話「屯門友全力支持屯門娜娜 贏左就唔使再喺屯門出現 功德無量」、「期待娜娜入圍」、「屯門娜娜又參賽，？，甘（咁）勇既？，甘（咁）多負皮都照去」及「如娜娜入圍，一定要請happy伯做觀眾先得」等等。