主辦俗稱奧斯卡頒獎禮嘅美國影藝科學學院，尋日公布新一年會員邀請名單，全球有398名電影業界人士獲邀請。近年喺香港影壇幕前幕後都盡心盡力嘅古天樂成為其中一員，如果佢接受邀請就會成為奧斯卡評審之一。
今年嘅邀請名單上有唔少亞裔演員名字，包括今屆奧斯卡最佳男配角關繼威、喺《奇異女俠玩救宇宙》演關繼威同楊紫瓊個女嘅許瑋倫(Stephanie Hsu)、台灣嘅張震、印度片《革命雙雄 RRR》2位演員Ram Charan以及NT Rama Rao Jr.。而《奇異女俠玩救宇宙》2位創作主腦關家永同Daniel Scheinert、日本導演岩井俊二都榜上有名。
至於西洋影人方面，流行天后Taylor Swift、《貓王》男主角Austin Butler、剛剛落選《超人》試鏡嘅Nicholas Hoult 都晉身名單之中。
今年獲邀嘅398位業界人士當中，4成係女性、34％係少數族裔，超過一半係美國以外嘅電影人。假如佢地全數接受邀請，美國影藝科學學院會員人數將會上升至10817人，而有份投票嘅就有9375位。而明年嘅第96屆金像獎將會喺3月10日舉行。