藝人郭柏妍與羅毓儀在劇集大玩「制服誘惑」，騷美腿兼嗲聲嗲氣，成功收服一眾男網民！原來羅毓儀本身是女僕服愛好者，家中珍藏多不勝數，更不介意cosplay出巡！
林敏驄、江美儀、郭柏妍、羅毓儀、鮑起靜及林穎彤等《下流上車族》演員昨日到社福機構宣傳，該劇收視再次報捷。第2集林敏驄與鮑起靜上演爭吵戲，阿驄激動表示：「我下半世淨係服侍你一個！」一幕，7天跨平台總收視錄得26.2點，是自4月放寬晚市堂食以來，翡翠台劇集單集最高收視。
前晚播出姊妹花郭柏妍與羅毓儀的女僕裝場口，成為網民熱話，羅毓儀昨日以私伙女僕裝出席活動，原來其家中有不少珍藏，她說：「本身勁鍾意Lolita Look。（夠膽着出街？）冇咩問題，好多妹妹都係咁着，旺角仲有商場專賣呢啲衣飾，不過入咗行真係少着咗。」對於男友被指激似林敏驄，她笑說：「我唔覺，佢就冇乜反應。」而郭柏妍笑說：「我係第一次着（女僕裝）咋，估唔到服飾有咁多配件。」談到為拍劇學踩滑板，她自認性急，難免有損傷：「不過我連踩單車都唔係好得，學識踩板好似成功解鎖咗新技能。」
預告結局篇催淚
林敏驄被問到是否有信心衝擊30點收視？他即說：「雖不中亦不遠矣！（嚟緊劇情你喊晒喎！）老婆（江美儀）咁靚仲唔喊咩？我決心單手同佢哋鬥演技，唔可以衰畀佢哋睇，我都只係出咗少少力咋！（結局催淚？）最後5集大家記住拎定紙巾，逐啲逐啲咁嚟，後來有啲變化，大家會睇得好肉緊。（有信心榮升師奶殺手？）師奶不嬲都有，最開心係啲網民完全冇鬧，佢哋話真係估唔到我咁好演技，我識睇住嚟食嘛！」談到劇中為慳錢買樓而到超市瘋狂試食，江美儀表示：「我食齋嘅，工作人員好好，安排咗素燒賣畀我。（當初上車都節衣縮食？）阿驄同我講，佢一炮過畀晒！」
