藝人朱智賢與男友謝東閔拍拖多年，昨日在活動上被追問嫁期，她揚言沒有驚喜不嫁，好姊妹麥美恩即自薦代為安排。
朱智賢、麥美恩（Mayanne）、江嘉敏及薛家燕等昨日宣傳賀歲劇《黃金萬両》，Mayanne透露父母最近由外地來港，加上因疫情而幾年沒有拜年，故今年展開「報復式」拜年，利是收入可觀！問到有否被長輩催婚？她笑說：「冇，因為傳媒經常問，所以佢哋唔使問，上網睇就得。」她更推波給身旁的朱智賢，指對方年紀比她大，論資排輩應該先結婚。
朱智賢自認事業型女性，要專心工作：「結婚順其自然，我要驚喜，冇驚喜唔嫁㗎！」Mayanne笑言以謝東閔性格難有驚喜，提議：「我幫你安排驚喜，就安排喺套劇大結局嗰日搞，謝東閔唔係咁難約。」問Mayanne可有到追求者家中拜年，她表示未有時間，下周要赴韓工作：「我可能搵個Oppa，不過要執一執個樣先，執到好似BLACK PINK嘅Lisa咁。」
薛家燕拍咀戲怕醜
薛家燕則自爆與劇中丈夫李成昌有接吻戲：「我哋拍咗幾次，我有幾十年冇拍，有啲怕醜，個心砰砰跳。（清場？）冇，又唔係拍床戲，如果真係拍床戲都要諗吓先，如果咁搞笑，觀眾又睇得開心咪諗吓。」而黃子恆在昨晚播出的一集扮財神，由於服裝厚如棉被，加上有動作戲，拍攝時差點中暑。
