人氣男團MIRROR成員Anson Lo、Edan及Stanley昨日型爆登陸尖沙咀，逾500鏡粉無懼寒冷天氣捧場，3子施展渾身解數冧Fans，當中Anson Lo更兩度繞場一周，嘟嘴賣萌又派心，令一眾「神徒」暈晒大浪！
3位鏡仔昨晨現身尖沙咀為時裝品牌拍攝官方照，吸引逾500鏡粉撐場，場面墟冚，有人更通宵捱冷霸靚位。3子於約10時半現身，全場Fans即瘋狂尖叫，而他們亦相當識做，不停揮手打招呼兼擺甫士，當中Anson Lo風騷自轉，又與Edan咬耳仔，Fans見這對《大叔的愛》CP互動也非常興奮，有人更趁機送禮物。
風騷繞場一周
其後3子在大會安排下輪流到溜冰場及纜車擺設拍照，鏡粉大讚他們靚仔又有型，有人更搞笑地對Stanley說：「我想同你搭纜車呀！」令努力Chok樣的他忍不住笑，並說：「唔好引我笑好唔好？」其後他化身暖男，叫Fans小心身體，不要着涼，而Anson Lo則風騷嘟嘴賣萌，又繞場大派心心！而Edan拍片時發生小意外，一部航拍機不慎撞向纜車擺設「炒機」墮地，但無損其靚爆心情，繼續向Fans揮手。
活動未有安排訪問環節，只是不停拍攝拍足45分鐘，但3子相當合作，乖乖企定定任影唔嬲，更再次繞場一周答謝Fans才登上保母車離開。
