藝人張寶兒早前為女團After Class擔任造型師，卻被狠批釀成「時裝車禍」，當中炎明熹（Gigi）更被指由少女變大媽。Gigi前晚出席活動時為張寶兒護航，力撐服裝具新鮮感又華麗，另一成員姚焯菲（Chantel）則興奮宣布將推出新團歌。
女團After Class前晚及昨日分別現身無綫遊戲節目《思家大戰》及慈善騷《星光熠熠耀保良》記者會，提到她們早前穿上由張寶兒安排的服飾，結果遭網民狠批打扮老氣，被指慘變大媽的Gigi力撐：「乜都要試吓，做藝人唔可以經常畀人同一個感覺，唔試唔知好唔好，唔試邊會有新鮮感？就好似我今日個髮型咁。我覺得當日個造型好華麗，係之前未試過。（網民話你老咗10年咁？）我唔覺，好華麗，令人眼前一亮，自己見到都嚇一跳，好新鮮。」Chantel亦贊同說法：「當晚係比較嚴肅同莊嚴嘅場合，咁着都好合理。（唔啱你哋嘅年紀？）我哋當晚着晚裝，晚裝就係比較隆重。」Gigi認為只是觀點與角度問題，每個人都會有不同看法，並發表金句：「時裝好深奧同奧妙，每個人有不同感受。」
Chantel又預告即將推出新團歌，故近日不時合體，對此大感興奮：「之前Gigi唔喺香港冇得見，呢排就成日見到，可以傾吓偈、講吓心事！」
任暟晴錄完處女作
至於《聲夢傳奇2》冠軍任暟晴是得獎後首次公開亮相，她表示不清楚是否已收到10萬元獎金，強調當初不是為獎金而參賽。對於得獎後7日就火速錄歌，她說：「首歌已經錄好，但未知幾時出，今次唔係一般嘅廣東流行曲，大家可以期待吓。」
另外，本報日前獨家爆《香港小姐再競選》由李芷晴與何沛珈爭雙料冠軍，她們前晚在活動上對賽果封口，何沛珈自言為才藝表演花了不少工夫：「我跳傣族舞，單係拉筋都花咗半個月時間，老師踩住我對腳做一字馬，當我係專業舞蹈員咁訓練。我依家變到骨骼精奇，可以將個人摺埋！」
