串流平台NETFLIX美國時間星期四證實裁員300人，連同早前削減嘅150個職位，合共450人成為失業大軍。NETFLIX回應時話，由於業務投資龐大，而成本上升但收益增幅放緩，因此要作出裁員決定。
據外媒DEADLINE報導，受影響嘅員工大部份來自美國。現時NETFLIX仲有11000名員工。
疫情以來，串流睇片變得更加普及，但而家多個國家逐步回復正常，各個平台前景又變得不明朗。「大台」NETFLIX今年真係冇運行，第一季流失20萬訂戶，股價比年初高位跌近7成，咁炒人節流正常不過。早喺4月，NETFLIX已經各旗下宣傳網站Tudum落手，裁走好似小編呢類內容專員（驚）。上個月，多名負責原創內容嘅總監級人物相繼執包袱。
NETFLIX今年內容製作成本高達200億美元，據講未有意思要cut，亦都好難cut － 一來劇集電影開咗工，數還是要找的。而且NETFLIX內容需求咁大，冇新劇新片上，流失客戶只會更多。下個月NETFLIX就出第2季業績，上季條數差過預期，而家季尾炒人，理解嘅。